Pimmusay ti tallo nga indibidual bayat a tallo ti masakit gapu iti maipagarup a panagraira ti hantavirus iti naglugananda a cruise ship nga aglaylayag iti Atlantic Ocean.
Sigun iti World Health Organization (WHO), dagiti tallo a pimmusay ket pasahero ti baro nga MV Hondius nga agdama a nakasanglad idiay Praia, maysa nga isla sadiay Africa.
Sipud idi Domingo, saan a pinalubosan dagiti autoridad a bumaba dagiti pasahero.
Gapu iti dayta, simmarungkar dagiti local health authorities iti nasao a barko a nangasestar iti dua a symptomatic crew members.
Maibasar iti MarineTraffic, pimmanaw idiay Ushuaia, Argentina ti MV Hondius, agarup pito a lawas ti napalabas.
Nagsardeng idiay Antarctica ken ti British overseas territory ti Saint Helena sakbay a nagsanglad sadiay Praia.
Sigun iti Oceanwide Expeditions, naglaon ti barko iti 170 a pasahero ken 71 a tripulante, agraman ti maysa a doktor.
Iti agdama, naipamaysa ti atensyon ti kompanya ti barko para iti salun-at ken kinatalged dagiti pasahero ken tripulante.
Saan a nalawag no kasano a napasamak dagiti impeksion ngem sigun iti WHO, endemiko ti hantavirus iti dadduma a paset ti Argentina ken Chile.
Agtultuloy paylaeng dagiti detalyado nga imbestigasion, agraman ti kanayonan a laboratory testing, ken epidemiological investigations.
Maipalagip a ti Hantavirus ket deadly respiratory illness wenno hantavirus pulmonary syndrome.
Sigun iti Centers of Disease Control and Prevention (CDC), kaaduan a maakaran dagiti tattao babaen ti direct contact kadagiti utot, nangruna iti ihi, ibleng ken lawayda.
