Namanamaen ni Senador Imee Marcos nga agawid iti pagilian a Pilipinas ni sigud a House Appropriations Committee chair Zaldy Co tapno ibutaktakna dagiti ammona maipapan iti naanomalyaan a flood control scandal.
Sigun iti Senadora, adda paylaeng sadiay Europe ni Zaldy Co.
Innayon daytoy a saan a nalaka ti pannakaiyawid ni Co iti pagilian, nangruna ket nainget ti Europa kadagiti kaso a ‘political oppression.’
Kabayatanna, binabalaw pay ti presidential sister ti kinuna ni Sen. Panfilo Lacson a maigiddanto a maiparang iti Senate Blue Ribbon Committee dagiti 18 a soldado a nagpabigbig a bagmen no maisubli ni Co iti Pilipinas.
Sigun kenni Sen. Marcos, dakkel a problema daytoy agsipudta saan a mabirukan ni Co nga uray ni President Ferdinand Marcos Jr. ket nabiktima iti ‘fake news’ seknan iti immuna a damag a naarestar ni Co sadiay Czech republic.
