Balligi a naipatungpal ti kaunaan a local film fest wenno ti Stories of the Valley Film Festival iti munisipyo ti La Trinidad.
Panggep ti nasao a film fest a bigbigen ken itandudo dagiti pelikula wenno film dagiti emerging ken amateur local filmmakers.
Kanayunanna, nagserbi daytoy a plataporma tapno maipabuya iti publiko dagiti pakaistoryaan iti rehiyon Cordillera.
Kalpasan iti lima nga aldaw a panangbigbig ken panangpabuya kadagiti local a pelikula, naipatungpal ti closing program idi kalman no sadino napadayawan dagiti nakipasset iti nasao a film fest.
Nagun-od ti pelikula a “Gunita” ti Best Film, Best Screenplay, Best in Film Editing, Best Director babaen kenni Ms. Ahraa Gween Mortero, ken Best Actress babaen kenni Ms. Jirzie De Guzman.
Naipaay met ti Best Production Design iti film a “Pula” pakairamanan ti Best Actor babaen kenni Mr. Rynner Mangay-at.
Nagun-od ti “Sololens” ti Best in Cinematography bayat a ni Special Jury Prize ket naipaay iti “The Valley Remembers”.
Mainaig iti dayta, impanamnama ni La Trinidad Mayor Roderick C. Awingan ti suporta ti lokal a gobyerno iti local film industry.
Pinagyamananna met dagiti direktor, organizers, participants, hurado, bisita, ken supporters ti nasao a film fest iti initiatibada tapno maitandudo ken maipakita ti kultura ti Kordilyera babaen iti pelikula. //bombokaren.c.s
