Nainget nga inlawlawag ni Interior and Local Government Secretary Jonvic Remulla idi kalman iti maysa a press briefing nga awan ti napasamak a panagatake idiay Senado kasaruno iti napasamak a shootout iti uneg ti senate building idi Mayo 13.
Sigun kenni Remulla, nalawag kadagiti amin nga ebidensya nga awan ti maawagan a panagatake iti uneg ti senado.
“All evidence points that there was no attack on the Senate,” sigun kenni Remulla.
Inlawlawagna metlaeng nga awan dagiti ahente ti National Bureau of Investigation wenno National Bureau of Investigation a nakauneg iti building ti senado idi napasamak ti nasao a gulo.
Innayon pay daytoy nagkiddaw iti tulong ni GSIS President ken General Manager Wick Veloso para iti seguridad ti GSIS kalpasan a nagkiddaw ni Senator Bato Dela Rosa kadagiti supportersna a mangisayangkat dagitoy iti prayer vigil idiay senado.
Inlawlawag ni Remulla nga 29 nga ahente ti NBI ti nagturong iti GSIS premises tapno mangisayangkat iti inspeksyon iti outdoor canteen hallway paturog iti Kalayaan Garden.
Sigun kenkuana, awan ti tactical gear dagitoy ken nalawag a nakakawes dagitoy iti uniporme ti National Bureau of Investigation.
Alas-syete dos ti rabii, mapapati a pimmanaw dagiti 27 bayat a nabati ti dua nga NBI agents iti nasao a lugar.
Kabayatanna, dinakamat ni Remulla a 7:44 ti rabii idi inbilin ni Acting Senate Sergeant-at-Arms Mao Aplasca iti operatiba ti Office of the Sergeant-at-Arms pakairamanan dagiti pulis ken Marines nga isagana dagitoy dagiti armasda.
Sigun kenni Remulla, makita iti CCTV ti panagsagana dagiti Marines kadagiti armasda sakbay a nagturong dagitoy iti hallway nga ayan dagiti NBI agents.
Iti baet ti 7:46 agingga 7:49 ti rabii, makita iti CCTV ti asok ken posible a muzzle fire kabayatan iti tensyon iti nagbaetan ti Senate Security personnel ken ahente ti NBI.
Kinumpirmar pay ni Remulla a ni Aplasca ti immuna a nagpaputok iti mamintalo a daras asideg iti nagpwestoan dagiti NBI, ngem saanna a direkta a tinutokan dagitoy.
Mapapati nga inpagarup ni NBI nga maatatake dagitoy isu’t gapunna a nagpaputok dagitoy iti “cover fire” . Nupay kasta, inyunay-unay ni Remulla a saan daytoy a naitutok iti senado ken dagos metlaeng a naibilin kadakuada a saanen dagitoy a bumales.
Immunan nga inwaragawag ti Malacanang nga awan ti panagatake a napasamak, maikontra iti impetteng ni Senate President Alan Peter Cayetano a naatake ti senado. //bombokaren.c.s
