Pinagyamanan ni Atty. Israelito Torreon, legal counsel ni Senador Ronald “Bato” Dela Rosa dagiti amin a Pilipino, abogado, ken dadduma pay a nangipatuolod iti suporta, legal opinyon, ken obserbasyon seknan iti kaso a sangsangwen ti senador.
Partikular met a bigbigbig ni Atty. Torreon ni Atty. Salvador Panelo seknan iti posible a panangipilada iti habeas corpus petition para kenni Senator Dela Rosa.
Sigun kenni Atty. Torreon, maawatanna ti nasao a singasingna ket manipud iti nasayaat nga intensyon.
Nupay kasta, kalpasanna nga inadal ti nasao a kaso, patienna a saan paylaeng a daytoy ti legal a remedyo iti agdama.
Umuna, sigun kenni Atty. Torreon, agbalin a premature wenno nasapa unay ti panangipila iti habeas corpus gapu ta saan pay laeng a naarestar ni Senator Dela Rosa.
Sigun kenkuana, nagturong ti senador iti senador a bukbukodna, naipasidung iti protective custody ti Senate Resolution No. 44, ken nawaya daytoy nga immikat.
Maikadua, inlawlawag ni Torreon nga awan ti maatap nga aktwal a restriksyon iti senador a maysa kadagiti basaran tapno agbalin a valid ti habeas corpus petition.
Maikatlo, impetteng ti abogado a saan a nalawag nu sino ti maibilbilang nga “illegal custodian” wenno illegal a mangigem iti senador.
Innayonna pay a saan a mabalin nga itudo ti senado daytoy gapu ta mismo a ni Dela Rosa ti nagkiddaw iti protekstion manipud kadakuada.
Nagballaag ni Torreon a mabalin a makaapekto kadagiti senadot ti panangipila iti nasao a petisyon. Nu managanan ti maysa nga ahensiya kas iti National Bureau of Investigation kas “illegal custodian”, mabalin a mangited daytoy iti legal a basaran tapno obiligaen dagiti otoridad nga arestarenda ti senador iti sidung ti bilin ti korte.
Inlawlawag metlaeng ni Atty. Torreon nga awan ti sakit ti nakemna kenni Atty, Panelo ken kadagiti abogado a mangipapaay iti singasing.
Nupay kasta, mangnamnama daytoy nga adadda a matalantan iti pribado dagiti sensitibo a banbanag seknan iti legal strategies tapno mapagtalianed ti integridad ti proseso. //bombokaren.c.sapirao
