Dumanon iti 54 a munisipyu iti rehion Cordillera ti nangipadamag iti zero crime incidents kalpasan a nainget ti kampania iti Police Regional Office–Cordillera kontra iti kriminalidad manipod Mayo 17 agingga 23, 2026.
Iti agpada a panawen, 22 wanted persons ti natiliw babaen iti nainget a manhunt operations iti nagduduma a police units iti rehion.
Maibasar iti report iti Regional Investigation and Detective Management Division, immuna ti Baguio City Police Office iti bilang dagiti natiliw nga addaan iti walo nga indibidual.
Simmaruno ti Benguet Police Provincial Office nga addaan iti innem a natiliw, bayat a sag-uppat met ti Ifugao ken Kalinga Police Provincial Offices.
Sigun iti pulisia, dua kadagiti natiliw ket karaman iti Most Wanted Persons iti lebel iti probinsia.
Kinuna iti PRO-CAR a ti nainget a police visibility operations ken napigpigsa a pannakikoordinar iti komunidad ti nakatulong iti panagtalinaed iti kinatalna iti sumagmamano a munisipyu ken dagiti police station areas.
Kadagiti probinsia, immuna ti Abra kadagiti kaaduan a munisipyu nga addaan iti zero crime incidents a dumanon iti 22, kasaruno ti Mountain Province nga addaan iti siam, Ifugao nga addaan iti walo, Benguet nga addaan iti innem, Kalinga nga addaan iti lima ken Apayao nga addaan iti uppat.
Iti siudad ti Baguio, ti Police Stations 1, 6, ken 8 ket nakailista metlaeng iti zero crime incidents iti kapada a panawen.
Sigun pay iti PRO-CAR, nakailistada metlaeng iti 85.71% Crime Clearance Efficiency ken 79.37% Crime Solution Efficiency, a mangipakpakita iti napartak a panagrisut ken panangsolbar kadagiti kaso iti rehion Cordillera.
