Impakaammo ti Land Transportation Franchising and Regulatory Board (LTFRB) a nasuspindir ti operasyon ti agarup 26 a bus ti Victory Liner kabayatan iti panangurayda iti resulta ti imbestigasyon iti aksidente a napasamak idiay Tuba, Benguet idi Sabado, Mayo 30.
Innayona pay a pinaawaganen ti Land Transportation Franchising and Regulatory Board (LTFRB) dagiti operator ti dua a Victory Liner passenger bus a karaman iti nasao a road crash a napasamak.
Sigun kenni LTFRB Chairman Atty. Vigor D. Mendoza II, naala dagitoyen ti police report seknan iti nasao nga aksidente ngem mangipaayda iti gundaway kadagiti operators a mangilawlawag iti napasamak.
Innayonna a naipaulog metten ti show cause order kadagitoy ken namnamaenda ti ‘full compliance’ manipud kadagiti maseknan nga indibidual ken kompanya.
“We already secured a police report of the incident but we will be giving them the opportunity to explain. They were already issued with a show case order and we in the LTFRB expect full compliance,” sigun kenni Chairman Vigor.
Maipalagip a napasamak ti maysa a road crash a nairamanan ti dua a pampasahero a bus a nangitunda iti ipupusay ti maysa a pasaeros ken pannakadangran iti agarup 90 nga indibidual.
Inlawlawag met Chairman Vigor a bayat a maisaysayangkat ti imbestigasyon, prayoridad da pay laeng ita ti panangsigurado ti seguridad dagiti nadangran a pasaeros nangnangruna kadagiti adda pay laeng iti pagagasan.
Kabayatanna, impakaammo ni Chairman Vigor a sinuspindiren ti LTFRG ti operasyon ti agarup 26 a bus ti Victory Liner kabayatan iti panangurayda iti resulta ti imbestigasyon ti nasao nga aksidente. //bombokaren.c.sapirao
