Sinuspinder ti Land Transportation Franchising and Regulatory Board (LTFRB) ti pannakaiwaras ti P12-per-liter fuel subsidy para kadagiti public utility vehicle (PUV) drivers gapu iti election ban iti public welfare ken social service programs sakbay ti Barangay and Sangguniang Kabataan Elections (BSKE).
Nupay kasta, umap-apela dagiti maseknan a driver iti gobierno a maipangato ti fuel subsidy wenno maaprobaran ti pending a kiddaw dagitoy para iti pannakaingato ti plete.
Dadduma kadagitoy ti mangikonkonsidera nga agsardengda paylaeng nga agpasada agingga nga awan paylaeng ti subsidiya dagitoy.
Iti sidong ti election code, maiparit ti public welfare ken social service programs kabayatan ti election period malaksid laeng no palubusan ti Commission on Elections (Comelec).
Sigun iti Comelec, silulukat daytoy a mangipalubos iti pannakaipaay ti fuel subsidy tapno maituloy.
Nupay kasta, awan paylaeng ti naawat daytoy a formal request manipud iti LTFRB.
