Nangipila iti uppat a kaso ni Atty. Amadeo Degay, maysa nga Animal Welfare Advocate kontra iti maysa a nalatak a restaurant iti Munisipyo ti La Trinidad nga addaan iti sumagmamano metlaeng a branch gapu iti panangi-serveda iti karne ti aso kadagiti customers dagitoy.
Dagiti inpila ni Atty. Degay a kaso ket pananglabsing iti The Meat Inspection Code of the Philippines, Anti-Rabies Act of 2007, Consumer Act of the Philippines, Food Safety Act of 2013 ken dadduma pay a pertinent laws, ordinances, ken regulations.
Iti pannakiuman ti Bombo Radyo Newsteam kenni Atty. Degay, dinakamatna a namin-adun a daras a makaaw-awat daytoy ti reports manipud kadagiti kliyente ken dadduma a customers ti nasao a restaurant nga agidiaydiaya dagitoy ti karne ti aso.
Innayon pay ni Atty. Degay a nakaawat daytoy iti impormasyon nga immunan a na-raid ti nasao a restaurant babaen kadagiti law enforcers gapu metlaeng iti panangi-serve da iti karne ti aso ngem nadismiss daytoy .
Idi Oktubre idi napalabas a tawen, nagdesisyon ni Atty. Degay nga apan mismo iti nasao a restaurant tapno ag-order ti pang-take out tapno mapaneknekan nga agilaklako dagitoy iti karne ti aso.
Imbinglayna nga apaman nga immuneg daytoy iti restaurant, napansinna a dagos ti signage iti ngato ti ruangan ti restaurant bayat nga inobserbaranna met ti menu board a nakadisplay iti ngato ti counter.
Dita metteng nga inalaanna ti ladawan dagiti permits ken certificate of business name registration ti nasao a panganan.
Sigun kenkuana, nakalista iti menu dagitoy ti “SPARE WITH RICE”.
Ti “SPARE” ket deceptive cover term wenno termino nga inaramatda para iti putahe iti karne ti aso.
Gapu iti dayta, pinagsaludsudanna ti babae nga adda iti counter nu ti “SPARE” ket para iti karne ti aso. Kinumpirmar met daytoy ti nasao a babae.
Kalpasan iti panag-order ni Atty. Degay ti take out, nagturong daytoy iti Regional Technical Operation Center-Cordillera, National Meat Inspection (NMIS) idiay Marcos Highway para iti laboratory analysis ti karne nga inorder daytoy.
Rinumwar iti resulta ti laboratory a karne ti aso ti inpa-examine daytoy no sadino nakalanad ti “Detected Dog DNA in Sample”.
Kabayatanna, impetteng ni Atty, Degay nga iti linteg, amin nga animal a maparte manipud iti saan a rehistrado, saan nga accredited meat establishment ken saan a dimmalan iti required inspection ket maiparit.
Malaksid iti dayta, sigun iti NMIS, dagiti karne ti aso a maidiaydiaya iti nasao a restaurant ket saan a nairehistro, illegally shipped ken na-classify kas hot meat.
Maipalagip a ti karne ti aso ket saan a ‘for consumption’ no sadino mapatawan ti saan a bumaba iti 6 months and 1 day ngem saan a sumurok iti 12 a tawen wenno multa a saan a bumaba iti P100,000 ngem saan a sumurok iti P1-Milyon ti panangidiaya kadagiti “hot meats”.
Iti agdama, dagiti nasao a kaso ket maipasidung iti panangtingiting.
Daytoy ti kaunaan nga agipila iti kaso ni Atty Degay kontra iti maysa a restaurant nga agidiay-diaya ti karne ti aso.
Agkidkiddaw met daytoy iti lokal a gobyerno para iti strikto pannakaiyemplementar ti Animal Welfare Act. // Bombo Noveh Organo
