Nangipila dagiti petision iti National Commission on Indigenous Peoples (NCIP) Regional Office dagiti Indigenous Peoples (IPs) manipod Balatoc, Pasil, Kalinga tapno ipasardeng ken ikkaten ti bileg dagiti permit iti panagminas a naipaay iti Makilala Mining Company Inc. (MMCI) iti uneg iti ancestral domain dagitoy.
Naipila idi Hunio 10, 2026, nagkiddaw dagiti petisioner a makanselar ti Mineral Production Sharing Agreement (MPSA) ken Certification Precondition (CP) a naipaay iti kompania.
Ti kopia iti reklamo ket naisubmitir metlaeng iti Department of Environment and Natural Resources (DENR) ken dadduma pay nga ahensia iti gobierno.
Sigun kadagiti Indigenous Peoples, ti nasao a mining agreement ket mapapati naaprobran idi Marso 2024 sakbay pay nga inruar iti NCIP ti Certification Precondition idi Setyembre 2024, nga ibilangda a panaglabsing iti Indigenous Peoples Rights Act (IPRA).
Impaganetget dagiti petisioner a kasapulan ti Free, Prior, and Informed Consent (FPIC) dagiti indigent sakbay a maaprobaran wenno marugian ti aniaman a panagminas iti dagada, kas maitunos iti IPRA law ken agdama a desision iti Korte Suprema.
Nangipila pay ti alegasion ti Balatoc Indigenous Cultural Community ken Balatoc Young People a mapapati nga inusar ti kompania ti “fraudulent means” ken nagpeke ti pirma tapno makagun-od iti approval para iti Memorandum of Agreement idi tawen 2022.
Nagballaag metlaeng iti komunidad a ti proyekto ket nangitunda iti malitarization, red-tagging, ken presensia dagiti pribado nga armado a tao iti lugar, a nangitunda iti buteng ken pannakaputed iti tradisional a panangimanehar ken katulagan iti kinatalna iti lugar.
Malaksid iti dayta, dinakamatda pay ti risgo ken posible a pannakadadael iti aglawlaw, karaman ti polusyon iti Pasil ken Chico River, panagregaay ti daga, ken pannakalbo iti kabakiran.
Sigun kadakuada, mabalin a makaapektar daytoy iti salun-at iti publiko ken pagbiagan dagiti residente a mangnamnama iti panagtalon ken kinabaknang iti Cordillera.
Iti agdama, awan pay ti statement ti Makilala Mining Company Inc. seknan kadagiti pammabasol.
