Iggem ita ti Philippine National Police (PNP) ti innem a kanayunan a paltog ni Senator Ronald “Bato” Dela Rosa.
Sigun iti PNP, dagiti paltog ket impaima ti abogado ni Sen. Dela Rosa.
Kabayatanna, nakikoordinar ti PNP Firearms and Explosives Office ken ti Regional Civil Security Unit 4A (Calabarzon) kadagiti kapolisan iti balay ti Senador sadiay Silang, Cavite para iti temporario a safekeeping.
Gapu iti daytoy, 26 kadagiti paltog ni Senador ti adda iti kustodiya ti PNP.
Immuna nga impaima ti abogado ti Senador dagiti 20 a paltog.
Sigun kadagiti otoridad, adda paylaeng ti 91 nga armas ti Senador manipud iti 117 a paltog a nakarehistro iti nagan daytoy.
Maipalagip nga impaulog ti PNP Firearms and Explosives Office ti pammalin para iti pannakaikkat ti lisensia ti paltog ni Dela Rosa kalpasan a naipaulog ti arrest warrant manipud iti International Criminal Court (ICC).
Mainaig paylaeng daytoy iti kaso a war on drugs iti administrasion ni sigud a President Rodrigo Duterte.
