Kinnidaw ti Ateneo de Manila University idi kalman iti publiko a liklikanda ti cyberbullying, online harassment, ken panangiwaras iti saan a naberipikar nga impormasyon kagiddan iti agtultuloy nga imbestigasyon iti rason ti ipupusay dagiti dua nga student-athlete a da Rene Baterbonia ken Divine Adili.
Sigun iti unibersidad, adda dagiti nagan ti sumagmamano nga atleta a madakdakamat iti online no sadino makapaspasar dagitoy iti bashing ken makaawawat dagitoy iti panangbabalaw manipud iti publiko.
Iti impablaak dagitoy nga statement, kiniddawda a liklikan dagiti anyaman nga spekulasyon seknan iti napasamak a trahedya ken bay-an dagiti otoridad a mangisayangkat iti imbestigasyon seknan iti nasao nga isyu.
Daytoy ket kalpasan nga inrekomendar ti Criminal Investigation and Detection Group (CIDG) ti panangipila ti reklamo iti maatap a pananglabsing iti Republic Act No. 11053 wenno ti Anti-Hazing Act of 2018 kontra iti 11 nga indibidual nga adda pakainaiganna iti pannakalmes da Baterbonia ken Adili
Immunan nga impakaamo ti Department of Interior and Local Government (DILG) a naduktalan dagiti imbestigador a maatap a dinmalan dagiti atleta iti nalabes a physical activities, punishment exercises, ken sea-based training iti delikado a kondisyon.
Inyebkas met ti nasao nga unibersidad ti agtultuloy a pannakipagladingitda iti pamilya dagiti pimmusay ken impasigurado da ti sibubukel a kooperasyonda kadagiti otoridad. //bombokaren.c.sapirao
