Naisalakan babaen dagiti rescuer ti maysa a kwarentay kuatro-anyos a security guard a nasurok walo nga aldaw a naipit iti narba a shopping mall idiay La Guaira, Venezuela, kalpasan ti dua a napigsa a ginggined a nagdayyeg iti amianan a paset ti nasao a pagilian.
Nabigbig ti naisalakan a ni Hernan Alberto Gil, a naguyod manipod kadagiti narba kalpasan ti sumagmamano nga aldaw a rescue operation a pinasetan dagiti lokal ken international rescue teams.
Maibasar iti kaudian a datos iti gobierno sadiay, dumanon iti 2,295 ti pimmusay bayat a rinibribu ti mapukpukaw.
Mapatta-patta met a nasurok 2,000 metric tons iti humanitarian aid ti naipatulod idiay Venezuela manipod iti nagduduma a pagilian.
Agtultuloy met latta ti search and rescue operations iti tengnga iti kinakurang iti nadagsen a kagawaan ken dumakdakkel a kasapulan para iti tulong medikal ken dadduma pay a kangrunaan a serbisio.
