Nakita ni Atty. Edgar Avila, legal luminary iti Baguio City, a nakapsot ti cross-examination ti defense team iti maikatlo nga aldaw ti impeachment trial ni Vice President Sara Duterte.
Iti interview ti Bombo Radyo, kinunana a saan a naan-anay a kinompronta ti depensa ti witness ti prosecution a ni NBI agent John Mark Calilung uray pay impakita ti video ni Atty. Zulieka Lopez, chief of staff ni VP Duterte tapno maammoan ti konsepto.
“Iyong cross-examination medyo hindi niya kinomfront ang evidence of prosecution. In fact, nakasama because they were trying to explain through the witness kung bakit ginawa ni VP ‘yong utterances at the same time they are admitting na merong utterances” sigun iti abogado.
Patien ni Atty. Avila nga imparang ti depensa ti nasao a video tapno ipakitada a napunnoan ni VP Sara kadagiti mapapati a harassment manipud kada President Ferdinand Marcos, First Lady Liza Araneta-Marcos, ken sigud a Speaker of the House Representative Martin Romualdez rason a naisawangna dagiti saan a nasayaat a sasao.
Kabayatanna, kinunana a nagballigi ti prosecution iti maikatlo nga aldaw ti impeachment trial gapu ta natungpalda ti panggepda a mapaneknekan a ti video manipud iti facebook ni Harry Roque a naiparang ket pudno ken saan a naaramid babaen iti artificial intelligence.
“Successful ang prosecution to authenticate ‘yong video to prove na hindi splice, na hindi artificial and to prove na na-publish ito, ” sigun kenni Atty. Avila.
Patien pay ti abogado nga adda ti posibilidad a makumbiktar ti Bise Presidente nu agtultuloy a nasayaat ti presentasyon ti prosecution.
Nupay kasta, nu agbasar dagiti senator-judges iti politika, nababa ti tsansa a makumbiktar ni VP Sara gapu iti bilang dagiti agbotos.//
