Pinaglibakan ti Malacañang ti alegasyon nga adda ti impluwensiya ti President Ferdinand Marcos Jr. iti imbestigasyon ti National Bureau of Investigation (NBI), mainaig iti maatap a panagpangta ni Vice President Sara Duterte iti biag ti presidente.
Sigun kenni Palace Press Officer Usec. Claire Castro, nabayagen nga adda iti sidong ti Department of Justice (DOJ) ti NBI ken paset ti executive branch ti DOJ isu’t gapuna a saan a rumbeng a kwestionaran daytoy.
Inlawlawag ni Atty. Castro nga adda ti bukod a mandato ti NBI a mangisayangkat iti imbestigasion iti anyaman a pangta iti presidente.
Sigun pay kenni Castro, napateg ti panagimbestigar iti nasao a banag tapno masigurado ti seguridad ti Presidente, First Lady, sigud a House Speaker, ken ti pagimbagan ti pagilian.
