Nangipila ti resolusyon ni Senate Committee on Energy Chairperson Senator Erwin Tulfo a panggep a paimbestigaran ti agtultuloy a panagngato ti singir ti kuryente iti pagilian.
Sigun kenni Senator Tulfo, panggep ti resolusyon nga ammuen ti ulit-ulit a killaat a panagngato ti electric bills ken makabukel kadagiti polisiya a mangipaay iti long term solution para kadagiti konsyumer.
Binigbig ti senador ti umad-ado a reklamo ti publiko seknan iti nangato a singir ti kuryente, komplikado a billing statements, saan nga accurate a pannakabasa dagiti metro, ken masansan a power interruptions.
Impetteng ni Tulfo a nupay ada karbengan dagiti electric distribution utility ken generation companies a mabawi dagiti gastosda, ada metlaeng ti karbengan dagiti konsyumer iti patas ken nalawag a singir iti kuryente kasta metten iti napartak a panangresolba iti reklamo dagiti konsyumer.
Kas dadaulo ti Senate Committee on Energy, nagkari met ni Tulfo a papartaken ti komite ti panangsarak kadagiti addang tapno mapababa ken aramiden nga abot-kaya a presyo ti kuryente para kadagiti Pilipino.
Sigun pay iti senador, iti agdama a panawen, rumbeng laeng nga iraman a karbengan ti kaada ti kuryente isu’t gapunna a rumbeng laeng a makaawat dagiti Pilipino iti patas a singir ken naurnos a serbisyo. //bombokaren.c.sapirao
