Impakaammo ti Baguio City Police Office (BCPO) a nakasagana dagitoy a mangipila iti legal action kontra kadagiti estudyante a karaman iti napasamak a bullying idiay Pinget National High School itay nabiit apaman nga agdesisyon dagiti parentes ti biktima a mangituloy iti legal complaint ken kalpasan iti panagadal dagiti maseknan nga ahensya iti nasao a kaso.
Sigun iti pablaak ti Baguio City Public Information Office (BCPIO), uray no saan nga ituloy dagiti parentes ti biktima a mangipila iti reklamo, mabalin latta a mangipila ti BCPO iti kaso kontra kadagiti Children in Conflict with the Law (CICL) no sadino agserbi kas complainant ti kapulisan.
Sigun iti pablaak, kinuna ni BCPO City Director Ruel Tagel a mannarimaanen ti panangurayda iti assessment ti City Social Welfare and Development (CSWDO) nu naglabsing dagiti menor de edad iti linteg.
Immuna metten a dinakamat ni CSWDO Officer Liza Bulayungan a mangipatungpalda iti nagsina nga assessment kadagiti ubbing.
Impetteng ni Tagel a physical injury iti sidung ti Revised Penal Code (RPC) ti posible a maipila kontra kadagiti CICL.
Malaksid iti dayta, posible metlaeng a maipila ti grave coercion wenno threat gapu iti maatap a panangpilit dagiti suspek iti biktima nga agpicture.
Sigun pay iti pablaak, inlawlawag ni Tagel a 15 nga estudyante ti karaman iti nasao a bullying incident no sadino amin dagitoy ket menor-de-edad.
Kabayatanna, inlawlawag ni Tagel ti agwarwaras nga impormasyon seknan iti 5-days suspension a naipataw kadagiti nangbully iti biktima.
Sigun iti nasao nga opisyal, napagdesisyonan daytoy kas disciplinary measure kabayatan iti meeting a naangay iti nasao a pagadalan idi Agosto 28 a dinar-ayan ti Barangay Councils for the Protection of Children ti Pinget, Child Protection pagadalan, BCPO Station 2, CSWDO, parentes ken guardians dagiti karaman iti nasao nga insidente, ken ti biktima.
Inlawlawag ni Bulayungan a ti 5-day suspension ket napagnunumuan kas maitunos iti Deparment of Education Order No. 06-Series of 2026.
Kabayatanna, maipatungpalto pay ti meetings kadagiti sumarsarunno nga aldaw apaman a mapagdesisyonan dagiti maiyanatup nga interventions iti nasao nga insidente.
Kanayonanna, inwaragawag ni BCPO City Director P Col Ruel Tagel a maipatungpal ti protective measures para kadagiti amin a karaman iti napasamak a bullying incident idiay Pinget National High School.
Kasaruno metlaeng daytoy ti agwarwaras a retribution ken cultural reference iti social media.
Sigun kenni Tagel, saanda a palubosan ti kastoy a pasamak ken paingtenda ti seguridad kadagiti amin a karaman iti nasao nga insidente.
Adda metlaeng dagiti maideploy a kapulisan tapno agbantay iti school premis
Imbinglayna metlaeng a nagkiddaw metlaeng ti nasao a pagadalan iti kanayunan a police visibility manipud iti Baguio City Police Office Station 2 ken panagpatrolya dagiti barangay iti aglawlaw ti pagadalan tapno masalakniban dagiti ubbing.
Sigun met kenni City Social Welfare and Development Officer Liza Bulayungan, impanamnama ti barangay ti Pinget, Pinsao Proper, ken Pinsao Pilot ti komitmentda iti panangpapigsa iti community-level interventions tapno masalakniban amin dagiti ubbing.
Maipatungpal met ti follow-up meetings seknan iti nasao nga isyu tapno mamonitor ti compliance ken agtultuloy a panagbantay kadagiti ubbing a karaman iti nasao nga insidente.
