Nadiskobre dagiti otoridad ti agarup P2.1 Milyon a gatad ti marijuana iti nagsina a marijuana eradication operation nga insayangkatda iti Probinsya ti Benguet ken Kalinga ita nga aldaw, Setyembre 12.
Idiay Probinsya ti Kalinga, maysa a plantasyon a namulaan iti agarup 10,200 fully grown marijuana plant (FGMJP) nga addaan iti Standard Drug Price (SDP) nga agarup P2 Milyon idiay Brgy. Loccong, Tinglayan babaen iti nagtipon a puersa ti Tinglayan Municipal Police Station (MPS), 2nd Kalinga Provincial Mobile Force Company (PMFC), Provincial Intelligence Unit (PIU) ken Provincial Drug Enforcement Unit (PDEU) ti Kalinga Police Provincial Office (PPO), kadua ti Philippine Drug Enforcement Agency (PDEA)-Kalinga.
Kabayatanna, iti met probinsya ti Benguet, maysa a plantasyon metlaeng ti marijuana a namulaan ti agarup 780 fully grown marijuana plant ti nadiskobre dagiti otoridad nga addaan iti Standard Drug Price a dumanon iti P156,000.
Naipatungpal ti nasao nga operasyon babaen iti nagtipon a puersa ti Bakun MPS, 1st Benguet PMFC, PDEU ken PIU ti Benguet PPO, Regional Intelligence Division ti PRO CAR, Regional Intelligence Unit-14, ken PDEA-CAR idiay Sitio Legab, Barangay Kayapa, Bakun.
Kagidan ti operasyon, dagos a pinuoran dagiti operatiba amin dagiti nadiskubre a marijuana plants bayat nga agtutuloy ti imbestigasyon tapno mabigbig dagiti dadduma pay a posible a plantasyon ti marijuana kadagiti kabangibang a lugar, kasta metlaeng dagiti indibidual nga adda iti likod ti panangimula kadagitoy.
