Kiniddaw ti International Criminal Court (ICC) Prosecution iti Trial Chamber III a maideklara a “fit for trial” ni sigud a president Rodrigo Duterte a sumangsango iti kaso a crimes against humanity.
Sigun kenni Acting Prosecutor Mame Mandiaye Niang, pamaneknek ditoy ti report dagiti panel of experts kalpasan a naipasidong ni Duterte iti medical examination.
Impaganetget ni Niang a saan a kasapulan ti sabali a panagdengngeg tapno maamuan no kabaelan ni Duterte a dumar-ay iti hearing.
Kabayatanna, insingasing ti prosekusyon a ti isu met laeng a panel of experts ti mangsukimat kenni Duterte iti kanito nga ibilin ti Trial Chamber ti baro a pannakasukimat ti salun-ut ti sigud a presidente.
Naituding ti maikatlo a status conference inton bigat, bayat a mapampanggep a mairugyan ti panagdengngeg intun Nobiembre 30, 2026.
