Personal a simmango ni sigud a Presidente Rodrigo Duterte iti maikatlo nga status conference iti kaso daytoy a crimes against humanity ita nga aldaw iti International Criminal Court idiay The Hague.
Daytoy ti umuna a panagparangna iti publiko kalpasan iti agarup maysa a tawen manipud idi naudi a naimatangan daytoy babaen iti video link idi Marso 2025 kasaruno iti pannakaarestar na iti pagilian a Pilipinas.
Simmango daytoy kalpasan nga inlawlawag ni Presiding Judge Joanna Korner ti ICC Trial Chamber III a manamnama ti personal a panagparangna kalpasan nga insumitir dagiti medical experts ti evaluation report daytoy.
Pokus ti mannarimaan a panagdengngeg ti panangtingiting iti timetable para iti panangsango dagiti testigon, panagsukat ti ebidensya dagiti dua a benneg, ken panagsagana sakbay iti pormal a panagrugi ti panangdengngeg a naituding inton Nobyembre 30, 2026.
Maipalagip a naarestar ti sigud a presidente idi napalabas a tawen babaen iti billeg nga impaulog ti nasao nga international tribunal gapu iti maatap a crimes against humanity babaen iti programa daytoy kontra iti iligal a droga.
