Idagdagadag ti Department of Health (DOH) kadagiti parentes ken mannursuro a sukimatenda ti ar-aramiden dagiti agtutubo iti social media.
Daytoy ket kasaruno ti napasamak nga insidente ti pammaltog kadagiti nagduduma a pagadalan iti pagilian a nakairaman dagiti estudiante.
Sigun iti ahensiya, nasken a maalerto dagiti nagannak iti panagbaliw ti emosyon ken kagagalad ti anak dagitoy.
Innayon ti ahensiya a posible nga indikasyon daytoy nga adda ti personal a pakaseknan ti maysa nga ubing.
Sigun kenni Jayson Roque, OIC-Division Chief ti Health Literacy and Behavior Change Division, dagiti warning signs ket pakairamanan ti kinaawan namnama, rikna ti kinaawan serserbi, panagsarita maipapan iti tarigagay a matay, panagsaludsod maipapan kadagiti pamay-an ti panagpakamatay ken dadduma pay.
Innayon ni Roque a rumbeng nga irugi dagiti nagannak ti kalmado a pannakisarita iti ubing iti kanito a maobserbaran dagiti nasao a warning signs.
