Napaneknekan ti prosekusyon ti Article II wenno ti saan a mailawlawag a kinabaknang ni Vice President Sara Duterte sigun iti maysa nga Constitutional expert iti siudad ti Baguio.
Iti pannakiuman ti Bombo Radyo kenni Atty. Lauro Gacayan, impeksana a daytoy ket gapu kadagiti dokumento manipud AMLC ken dadduma pay nga ahensya ti gobyerno.
Gapu iti daytoy, impeksa ni Atty. Gacayan a rumbeng nga agtugaw ni Vice President Sara Duterte tapno ilawlawagna ti maipanggep iti nasao nga akusasyon.
Kagidan dayta, inlawlawag ni Atty. Gacayan a sakbay ngamin nga agtugaw iti ehekutibo, rumbeng a nag-divest wenno nagikatdan kadagiti kompanya wenno negosyo dagitoy gapu ta maipawil ti conflict on interest.
Iti kaso ni VP Sara, saan a mabalin nga ipractice na ti kina-abogado na kasta metten a saan a mabalin a karaman daytoy iti anyaman a negosyo iti kompanya.
Gapu iti daytoy, impeksa ni Atty. Gacayan a rumbeng nga ilawlawag ni VP Sara dagiti dadakkel a gatad nga adda iti bangko daytoy, iti baet a rumbeng nga awan ti anyaman a negosyo wenno dadduma a trabaho daytoy.
Iti baet dayta, inlawlawag ni Atty Gacayan a saan a katukad ti unexplained wealth ti ill-gotten wealth. Sigun kenkuana, ti unexplained wealth ket dagiti kinabaknang a saan a nailawlawag nu ayna ti nagtaudanna. Mabalin a nagapu daytoy iti tawid a kinabaknang ken dadduma pay. Saan a kayat a sawen daytoy a ti nasao a kinabaknang ken natakaw.
Isu’t gapunna nga impeksa ni Atty. Gacayan a rumbeng a maikan ti gundaway ni VP Sara a mangilawlawag kadagiti kinabaknang daytoy. Sigun kenkuana, ‘presumed innocent” ti bise presidente agingga mapaneknekan nga adda iti kinabaknang daytoy a saan a mailawlawag.
Nupay kasta, agtaltalinaed nga unexplained wealth ti nasao nga issue gapu ta saan pay laeng nga inlawlawag ni VP Sara ti nagtaudan dagiti kinabaknangna.
Impeksa ni Atty. Gacayan nga apaman nga ilawlawag ni VP Sara dagiti nasao a kinabaknang ket adda met iti nalawag a pammalawagna, posible a ma-acquit daytoy.
Manamnama met nga isumitir ita nga aldaw ti prosekusyon dagiti amin a namarkaan nga ebidensyada para iti impeachment ni VP Sara.
Impeksa ni Atty. Gacayan a napateg ti testimonya ni Atty. Cabrera gapu ta inpresenta na laeng dagiti dokumento a nagapo kadagiti bangko ken opisina iti gobyerno.
Maysa kadagiti napateg nga inpresenta daytoy ket ti agarup P315 Million nga inmuneg iti kompanya a maikonkonekta kenkuana no sadino saan daytoy a naikabil iti SALN na pakiaramanan ti share a naala daytoy manipud iti nasao a korporasyon.
Malaksid iti dayta, saan metlaeng a naideklara iti financial statement ti nasao a korporasyon ti kitkitaen ni VP Sara.
Dagitoy dagiti dadduma a kasapulan nga ilawlawag ni VP Sara Duterte, sigun iti nasao nga abogado.
Kabayatanna, inlawlawag ni Atty. Gacayan a saan a mabalin nga iraman ti asawa ti bise presidente a ni Atty. Manases Carpio gapu ta saan daytoy a subject iti nasao nga impeachment .
Nupay kasta, apaman nga adda dagiti makita a kaso a mabalin a maipila kontra kenkuana, mabalin dagitoy a maipila ngem iti daddumanto a forum ken saan nga iti impeachment trial. //KCS//
