Binigbig ni Interior Secretary Jonvic Remulla ni sigud a Bangsamoro Parliament member Edriezan Hadji Nasser Rimbang a daytoy ti maipagarup a financier iti panangipuslit iti ₱3.5 billion wenno 521 a kilos ti maatap shabu manipud sadiay Laos.
Nakompiskar daytoy dagiti otoridad sadiay Laos iti Oktobre 1, sakbay a maiturong iti Pilipinas.
Sigun kenni Remulla, maatap a nagbayad ni Rimbang iti landing rights ken maysa a pribado a hangar a pakaiturungan ti illegal a droga.
Innayon ti opisial a nagtaud sadiay Malaysia ken nagturong sadiay Laos ti inaramat da Rimbang nga eroplano.
Kabayatanna, maatap a karaman metlaeng iti nasao a plano ni Police Master Sergeant Aileen Jane Manalo Mendoza, nga iti agdama ket adda iti restrictive custody ti Aviation Security Group.
Inlawlawag ni Remulla a saan a nagdisso wenno nakasrek iti masakupan ti Pilipinas ti eroplano agsipudta nalapdan.
Sigun kadagiti otoridad, agarup 13 nga indibidual ti nabigbig a mapapati a karaman iti nasao a plano.
