Agtultuloy ti panagsagana ti Police Regional Office-Cordillera (PRO-COR) para iti panangpatalged iti seguridad dagiti umay a manglagip kadagiti minatayda bayat ti panangobserbar ti Undas 2026.
Impanamnama met ti PRO-COR a maideploy ti nasurok 1,000 a police personnel kadagiti 190 a sementeryo, lima a memorial parks, ken maysa a columbarium iti intero a rehion Cordillera.
Sigun kenni PLTCol Genevieve Revocal, Police Information Officer ti PRO-COR, mairaman iti deployment plan ti panangipaay kadagiti 224 a personnel para kadagiti Police Assistance Desk tapno makatulong ken mangipaay iti tulong kadagiti umili ken bisita.
Mapatta-patta a dumanon iti pakabuklan a 1,371 a police personnel ti maideploy para iti nasao nga operasyon, a mangbantay kadagiti pagturongan dagiti turista, kadagiti terminal, kangrunaan a dalan, ken dadduma pay a lugar a mabalin a pagtipunan dagiti tattao.
Babaen kadagitoy a deployment, panggep ti kapulisan a mapabileg iti presensia dagiti awtoridad a mangsalaknib kadagiti umili, ken mangpasayaat iti panagdaliasat dagiti umay a bisita.
Kabayatanna, nagpalagip manen ni PLTCol Revocal iti publiko a liklikanda ti panangitugot kadagiti bladed weapons, nasanger nga inomen, ken sigarilyo iti uneg dagiti sementeryo, kas paset ti panangsigurado iti natalna ken natalged a panaglagip kadagiti minatay.
Nagpallagip met ti kapulisan kadagiti pamilia a bantayanda a nasayaat dagiti ubbing a kadua da iti panagturong iti sementeryo, nangruna kadagiti sementeryo a mabalin a pakapunoan dagiti tattao.
Pinalagipanna metlaeng dagiti senior citizen ken kadagiti addaan iti sakit a mangitugot kadagiti agasda, danum, ken first-aid kit tapno nakasaganada iti kanito nga ada mapasamak nga emerhensia.
Impeksa met ti kapulisan ti kinapateg ti panangsalwad kadagiti personal a kagawaan, kas kadagiti pitaka, cellphone, ken dadduma pay a napateg a gamit, tapno maliklikan ti pannakapukaw wenno pannakatakaw dagitoy.
Sigun iti kapulisan, napateg ti pannakitinnulong ti publiko tapno agbalin a natalna, nasayaat, ken natalged ti pananglagip kadagiti minatay iti panawen ti Undas.Nupay kasta, naipalagip met kadagiti umili a no mabalin, bantayanda metlaeng ti seguridad dagiti babbalayda sakbay a pumanawda, babaen iti panangserra kadagiti ruangan ken tawada. //via Bombo Khey Reparip
