Pinaglibakan ti maysa nga spokesperson a saan a miyembro ti Cordillera People’s Liberation Army (CPLA) dagiti grupo a maatap a nangpilit a nangserrek ken naggiyan iti naaladan a house and lot property a nairaman iti family disputed itay nabiit.
Sigun iti spokesperson, apaman a nadamagda ti nasao nga issue inverifyda a dagus daytoy no sadino naduktalanda a saan dagitoy nga aktibo a miyembro ti nasao a grupo.
Nupay kasta, innaklon metlaeng dagitoy iti kamaudianan a sumagmamano kadagiti indibidual a nangserrek ken nang-occupy iti disputed property ket sigud a CPLA ken maysa kadakuada ket former commando.
Iti baet dayta, pinaglibakan metlaeng dagitoy a saan a dumanon ti baente dagiti nangpilit a sumrek ken agnanaed iti nasao lugar.
Amin dagitoy ket naiyebkas bayat ti dialogue itay nabiit iti nagbaetan ti dua a partido. Indauloan met ni Councilor Joel Molintas ti nasao a dayalogo nga inobserbaran met ti BCPO S9.
Mainaig ti dayta, napagtungtungan ti dua a partido iti nasao a dayalogo nga agnaed paylaeng iti nasao a disso ti grupo a nangserrek ken nag-occupy kaduada ti caretaker agingga a malpas ti agdama a kaso a naipila iti korte.
Sigun kenni Benedict Valenciano, caretaker iti nasao a house and lot, napagpili ti nasao a grupo nu boluntaryo dagitoy a pumanaw ngem kasla pinili ti nasao a grupo nga agiyanda pay sadiay bayat a maururay ti pangngeddeng ti korte.
Imbinglay metlaeng daytoy a maysa kadagiti napagtutulaganda ket awan ti ag-gugulo iti nasao a lugar.
Innayunna na pay a nupay a nasayaat ti resulta ti tungtungan, nasken latta a t desisyon ti korte ti masurot.
Kabaytanna, impeksa met ni PCPT Johnsen Unay, Station Commander ti Baguio City Police Office Station 9 a nagobserbada laeng bayat ti dialogue ken awan ti karbenganda a mangipakaammo iti dadduma a detalye seknan iti napagtutungtongan.
Nupay kasta, maysa kadagiti nadakamat iti nasao a dayalogo ti pannaka-pullout ti police presence iti nasao a pasdek la kitdi awan ti agugulo, reklamo, ken court order.
Kabayatanna, nagkedked met ni Councilor Molintas nga agpainterview seknan iti napasamak a dayalogo. //via Bombo Vy
