Nagpalagip ti Fertilizer and Pesticide Authority-Cordillera (FPA-CAR) kadagiti mannalon seknan iti panagmula kadagiti root crops a kas iti kamote ken cassava.
Sigun iti ahensiya, maysa daytoy a wagas tapno masalakniban ti pagbiagan ken apit kabayatan ti El Niño.
Pagaammo dagiti root crops a mabalin a maapit uray no agkurang ti danum, isu’t gapuna a mabalin a pagpilian dagiti mannalon kabayatan ti nabara ken namaga a paniempo.
Nupay kasta, impalagip ti ahensiya a masapul latta ti umno a panangtaripato kadagiti mula ken panangaramat kadagiti kasapulanda tapno nasaysayaat ti panagdur-as ken apit dagitoy.
Malaksid iti panagpili kadagiti mula a maiyannatop iti kasasaad ti paniempo, impalagip metlaeng ti FPA-CAR ti napateg a papel ti umno a panagaramat iti abono tapno saan a masayang ti gastos ken matulongan ti mula nga agtultuloy a dumakkel.
Sigun kenni Rogelio B. Tanguid, Regional Officer ti FPA-CAR, masapul a maurnos ti kaadu ken kita ti abono a maus-usar, nangruna kadagiti abono nga addaan iti nitrogen, gapu ta ti nalabes a panagaramat iti daytoy ket mabalin a mangpalangto unay iti mula ken mangpabassit iti kabaelanna a mangibtor iti kalgaw.
Innayunna a napateg metlaeng ti potassium ken phosphorus tapno mapapigsa dagiti mula ken matulongan dagiti ramot a mangsipsip iti danum ken sustansiya manipud iti daga.
Maipalagip a maibasar iti pakdaar ti DOST-PAGASA, mabalin nga agtultuloy ti El Niño agingga iti maikadua a kuarter ti 2027, isu’t gapuna a maibalbakad kadagiti mannalon ti nasapa a panagplano ken panagsagana tapno makissayan ti epekto daytoy iti agrikultura.//Bombo Khey Reparip
