Guyguyoguyen ti National Commission on Indigenous Peoples (NCIP) dagiti tattao ken ti komunidad a salakniban ken ipreserba ti kultura ken tawid dagiti katutubo iti tengnga ti panagdur-as ti teknolohiya.
Sigun kenni Atty. Brian Masweng, Regional Hearing Officer ti NCIP, napateg a saan a malipatan ti kultura ken tradision uray no agtultuloy ti panagdakkel ti digital technology.
Inlawlawag na a mabalin a makatulong ti Association of Southeast Asian Nations (ASEAN) iti panangsalaknib iti kultura babaen iti panangipateg kadagiti tradisionda, nangruna iti pannakikadua dagitoy iti panangaywan iti aglawlaw.
Nangruna met a masalakniban dagiti karbengan dagiti komunidad iti bukodda a disenyo, kinalaing iti panagabel ken musika tapno saan nga aramaten dagitoy dagiti dadduma nga awan ti pammalubos dagitoy.
Malaksid iti dayta, masapul a mapapigsa ti pannakipaset dagiti katutubo iti digital world, saan laeng a para iti panangsalaknib iti kultura, no di ket panangaramid ken panangibinglay kadagiti digital content a mangipakita iti kinapateg ti bukodda a tawid.
Babaen iti daytoy, manamnama a maipatuloy ti panangipateg iti kultura ken tradision dagiti katutubo bayat ti panagdur-as ti teknolohiya, ken maipasa dagitoy kadagiti sumaruno a henerasion.//Bombo Khey Reparip
