Nangisayangkat ti Meat and Fishery Products Monitoring Task Force iti inspeksiyon ken monitoring kadagiti supermarket iti Central Business District (CBD) ken Magsaysay Avenue, Baguio tapno masigurado ti kinatalged ken kalidad dagiti karne ken seafood a mailaklako kadagiti konsyumer.
Karaman iti inspeksiyon dagiti miembro manipud iti Baguio City Veterinary and Agriculture Office (CVAO), Department of Trade and Industry (DTI) Baguio-Benguet, Permits and Licensing Division (PLD), Mayor’s Office Public Order and Safety Division (POSD), Baguio City Health Services Office (HSO), National Meat Inspection Service-Cordillera (NMIS-CAR), Food and Drugs Administration-Cordillera (FDA-CAR), ken Bureau of Fisheries and Aquatic Resources-Cordillera (BFAR-CAR).
Sinukimat dagiti miembro ti task force dagiti karne ken seafood a displayed for sale, dagiti cold storage facilities, ken dagiti lugar a pakaiprosesoan dagitoy tapno masigurado a nasayaat ti panangimanehar ken natalged a kanen dagiti tattao.
Sinukimatda metlaeng ti panangtungpal dagiti establisimyento kadagiti kasapulan a business permit.
Kas resulta ti inspeksiyon, nangipaulog ti CVAO iti notice of violation iti maysa kadagiti supermarket gapu iti panagaramatda iti deceptive lights a mangallilaw iti konsyumer iti pudno a langa wenno itsura dagiti karne.
Nakumpisakar ti task force ti 81.55 kilos a lames gapu iti spoilage wenno saanen a natalged a kanen.
Gapu iti daytoy, pinalagipan ti task force dagiti aglaklako iti karne ken lames nga ipatungpalda ti nasayaat a kinadalus, panangidulin kadagiti produkto iti umiso a temperatura, ken umno a panangimanehar kadagitoy tapno masigurado ti kinatalged ken kalidad dagitoy.
Nagpalagip metlaeng dagitoy kadagiti konsyumer a sumakimatenda a nasayaat dagiti karne ken seafood sakbay a gatangen dagitoy.//Bombo Khey Reparip
