Nangisayangkat dagiti personnel ti Tuba Municipal Police Station (MPS) iti lecture kontra iti bullying ken panangpapigsa kadagiti positibo a pateg dagiti estudyante idi kalman, October 27, sadiay Saint Louis High School–Philex, Itogon, Benguet.
Indauluan ni Police Executive Master Sergeant (PEMS) Jenny Lyn Bengwasan, Police Community Relations Non-Commissioned Officer (PCR PNCO), ken Police Master Sergeant (PMSg) Jenny Anekang, Women and Children Protection Desk Non-Commissioned Officer (WCPD PNCO) ti aktibidad babaen iti direkta ken panangimaton ni Police Major (PMAJ) Orville Wap, Chief of Police (COP) ti Tuba MPS.
Bayat iti lecture, imbinglay ni Police Master Sergeant Anekang dagiti nagduduma a kita ti bullying, dagiti epekto daytoy kadagiti estudyante, ken ti dakes nga epektona iti proseso ti panagadal ken iti pagadalan.
Inlawlawagna ti kinapateg ti respeto, kinaimbag, ken responsable a panagtignay tapno mapagtalinaed ti natalged, natalna, ken naurnos a pagadalan.
Kabayatanna, impakaammo ni Police Executive Master Sergeant Bengwasan dagiti programa ken proyekto ti Tuba MPS, nangruna ti Project PANSEGSHAN, nga addaan panggep a tumulong kadagiti agtutubo ken estudyante babaen iti panangisuro iti disiplina, sportsmanship, respeto, ken positibo a pateg babaen kadagiti sports, nangruna ti Taekwondo.
Babaen iti daytoy a proyekto, panggep ti otoridad a mapapigsa ti pisikal a salun-at, panagtalek iti bukod a kabaelan, panagibtor, ken panangkontrol kadagiti bukod a rikna dagiti agtutubo, bayat a maisuro kadakuada ti panagrespeto iti sabali, panangsurot kadagiti pagannurotan, ken kinapakumbaba.
Kabayatanna, inawis ti Bravehearts Martial Arts Institute dagiti estudyante a makipaset iti Taekwondo ken kadagiti dadduma pay a produktibo nga aktibidad tapno mapadur-as dagiti talentoda ken kabaelanda, mapapigsa ti karakter, ken maliklikan dagitoy dagiti ilegal a droga, kinaranggas, ken dadduma pay a negatibo nga impluensia.
Manamnama a babaen iti nasao a proyekto, agbalin dagiti agtutubo a responsable, nadisiplinado, ken naan-anay a tattao a makatulong iti pamilia, pagadalan, ken komunidad.
Kabayatanna, nagserbi da Bengwasan ken Anekang a judge iti panangiparang dagiti estudyante kadagiti cultural dance, a nangipakita kadagiti nagduduma a tradisyon ken nawadwad a kultura dagiti tribu iti Cordillera Administrative Region (CAR).
Babaen iti pannakipaset dagiti opisial, napateg ti pannakabigbig kadagiti talento ken kredibilidad dagiti estudyante, panangipategda iti kultura ken panangsalaknib iti nabaknang a tawid ti Cordillera.// Bombo Khey Reparip
