Mangnamnama ti Tuba Central National High School iti positibo a resulta ti memorandum of agreement (MOA) a pinirmaanda, kaduada ti Tuba Municipal Police Station (MPS) seknan ti “Junior peer advocates against bullying (JPAAB) empowering young student leaders to be advocates of peace.”
Sigun kenni Tuba Central NHS School principal Gerald Salda, maysa ti kapulisan kadagiti partners ti pagadalan para iti seguridad dagiti estudiante ken intero a pagadalan.
Malaksid iti dayta, maysa metlaeng dagitoy a mang-educate kadagiti ubbing.
Impeksa ni Salda nga uray generally safe ken friendly ti nasao a pagadalan, kasapulan latta ti presensiyia dagiti kapulisan ken ti pannakaipatungpal JPAAB tapno ma-equip ken mapasayaat dagiti estudiante seknan iti leadership skills ken dadduma pay a pagsayaatan dagitoy.
Kabayatanna, kinuna ni PCPT. Marlon Papco-o, Deputy ti Tuba MPS nga agserserbi daytoy kas pro-active measure.
Mangnamnama metlaeng dagitoy nga adda ti nasayaat nga impekto ti nasao a programa.
Inlawlawag ti opisyal a ti MOA ket maysa a wagas tapnu ma-addressan ken maprebentaran ti anyaman nga insidente wenno krimen a kas iti napasamak kadagiti sumagmaano a pagadalan iti pagilian.
Impeksa ni Papco-o a masurwan dagiti estudiante nga agbalin a nasayaat nga umili, mangisakit kadagiti kaeskuelaanda, ken mapasayaat dagitoy nga agbalin a lider iti masanguanan ken dadduma pay.
Malaksid iti nasao a programa, agtultuloy ti panangsiguroda iti kinatalged dagiti pagadalan, panangiwanawan ken ti pannakitinnulong dagiti opisiales ti Barangay iti nasao a lugar.
Ti JPAAB program ket inisiatiba iti sidong ti “Assisting Visitors and Residents Actively (A.V.A) Policing program” ti Tuba MPS a nadeveloped idi 2014 kas community-oriented policing strategy.
Maysa kadagiti kangrunaan nga aktibidad ti A.V.A POLICING PROG ket ti pannakaibangon ti Junior Police organization a buklen dagiti student leaders nga agserbi kas partners ti PNP.
Nairanta daytoy para iti pannakaitandudu ti disiplina, seguridad ti pagadalan, ken positive values.//Bombo Noveh Organo
