Guyguyugoyen ti Securities and Exchange Commission (SEC) ti publiko nga agbalin a naannad ken nasirib iti panag-invest iti kuarta dagitoy tapno maliklikan a mabiktima iti investment scam.
Sigun kenni Helen Veryan Valdez, Information Officer II ti SEC Baguio Extension Office, nasken a kitaen ken beripikaren ti publiko no rehistrado ti kompania ken addaan iti umno a lisensia a mangidaton kadagiti investment products sakbay nga agipaay wenno mangipondoda iti kuarta.
Sigun kenkuana, nupay nasayaat ti agbirok iti kanayunan a pamasrekan para iti inaldaw a panagbiag, masapul a siguradoen nga awan ti panangallilaw ken maawatan ti publiko no kasano nga agtaray ti investment ken aniya dagiti peggad a mabalin a mapasaran.
Nagballaag met ti opisyal kadagiti saan a mapagtalkan nga investment offers, nangruna dagiti agikarkari iti nangato ken sigurado a tubo iti apagbiit a panawen, wenno mangpilit kadagiti tattao nga agited a dagus iti kuarta.
Nagpalagip ti SEC a saan nga imdas ti panagrehistro ti maysa a kompania tapno maipatalged a legal daytoy para iti investment, agsipudta kasapulan ti maiyannatop a lisensia wenno autoridad manipud iti ahensia.
Kabayatanna, guyguyuguyenna dagiti nabiktima ti investment scam, nangruna dagiti napukawan iti kuarta, nga ireport iti SEC tapno maipakaammo dagiti reklamo ken maipaay ti umno a tulong ken panangiturong kadakuada.
Iti sabali a bangir, mabalin a kitaen ti publiko ti rehistro ken lisensia dagiti kompania babaen iti opisial a Check with SEC online portal, ken kitaen dagiti investment advisories ti ahensia tapno maamuan no adda ti pakdaar maipapan iti kompania a mangidaton iti investment.// Bombo Khey Reparip
