Napadayawan dagiti nagduduma a service providers ita nga aldaw sadiay Baguio City Jail Male Dormitory gapu iti dakkel a suportada kadagiti programa ken aktibidad ti Bureau of Jail Management and Penology-Cordillera Administrative Region (BJMP-CAR).
Paset daytoy iti panangselebrar iti National Correctional Consciousness Week (NACOCOW) 2026 a nangrugi idi October 25 ken agpatingga inton October 31.
Nangipaay met iti closing message ni Jail Chief Superintendent Delvic L. Oriero, Regional Director ti BJMP-CAR, no sadino impapaganetgetna ti kinapateg ti panangipaay iti pannakaawat ken suporta kadagiti Persons Deprived of Liberty (PDLs), gapu ta adda paset iti tunggal maysa iti panagbalbaliw ken panangpasayaat ti biag dagitoy.
Impeksana met ti panagyaman ti BJMP-CAR kadagiti service providers gapu iti tulong ken suporta nga ipapaayda kadagiti programa a mangpabpabileg iti rehabilitasyon dagiti PDLs.
Innayonna pay a babaen iti panagtitinnulong dagiti service providers ken ti BJMP, maipaay kadagiti 844 a PDLs ti gundaway nga agbaliw, mangpasayaat iti karakterda ken mangurnos manen kadagiti biagda.
Inlawlawagna pay ti kinapateg ti panangikkat iti stigma wenno negatibo a panangmarka iti publiko kadagiti PDLs, tapno saanda a kanayon a maibilang a naidumduma gapu kadagiti biddut a naaramidda, no di ket maipaay kadakuada ti gundaway a mangrugi manen ken agbalin a nasayaat a paset ti komunidad.
Gapu iti daytoy, pinagyamanan ni Oriero dagiti service providers a nagbalin a kadua ti BJMP-CAR iti panangipaay iti namnama ken nasaysayaat a masakbayan dagiti PDLs. //via Bombo Khey Reparip
