Impakammo ti Baguio City Government a bimmaba iti agarup 15 agingga 18 percent ti tourist arrivals iti siudad ti Baguio bayat ti panaglagip iti UNDAS 2026.
Impeksa ni Baguio City Mayor Benjamin Magalong a naobserbaran ti panagbaba dagiti turista ita no idilig kadagiti napalabas a pananglagip iti Undas.
Inlawlawag ni Mayor Magalong a naibasar ti datos kadagiti assessment ken survey nga inaramid ti lokal a gobierno kadagiti sementeryo ken nadumaduma a tourist destinations iti siudad.
Innayonna a mabalin a maysa kadagiti nakaapektar iti panagbassit ti tourist arrivals ket ti agdama a kasasaad ti ekonomiya iti pagilian, a mabalin a nangiturong kadagiti pamilia ken indibidwal a mangikeddeng a mangkissay iti gastoda iti panagbiahe ken panagbakasion.
Nupay kasta, adda latta dagiti turista a bimmisita kadagiti nalalatak a pasyaran iti siudad a kas iti Lion’s Head, Baguio Arboretum, Burnham Park, The Mansion House ken Wright Park.
Iti sabali a bangir, impetteng ti Mayor a generally peaceful ti panaglagip iti Undas iti siudad iti baet nga adda dagiti insidente a nairekord a kas iti vehicular accidents, panagtakaw ken dadduma pay a kaso.
Sigun met iti Baguio City Police Office, rinib-ribu nga indibidual ti nagturong iti Baguio City Public Cemetery para iti Undas.
Maipalagip a sakbay ti Undas, impakaammo ti BCPO a nasurok iti 1000 a police personnel, support units, augmentation groups ken volunteers ti nai-deploy para iti Oplan Kaluluwa 2026 tapno masigurado ti kinatalged dagiti publiko kadagiti sementeryo, tourist destinations ken dadduma pay a napateg a lugar iti siudad.//Bombo Khey Reparip
