Nagballaag ti Securities and Exchange Commission (SEC) ken Bangko Sentral ng Pilipinas (BSP) ti publiko mainaig kadagiti digital scams, nangruna kadagiti advance-fee lending schemes ken panangallilaw babaen kadagiti investment fraud.
Sigun kenni Helen Veryan Valdez, Information Officer ti SEC Baguio Extension Office, maysa kadagiti masansan a reklamo a maawatda ket maipanggep kadagiti online lending applications no sadino makidaw nga pay nga umuna dagiti kliyente sakbay a maited ti inutangna a kuarta.
Inlawlawag ni Valdez a kadagiti legal ken rehistrado a lending applications, maikessay ti nasken a mabayadan manipud iti pakabuklan nga utang sakbay a maited iti tao ti net proceeds wenno ti pudno a gatad ti kuarta a maawatna.
Innayonna pay a saan laeng a panangallilaw babaen kadagiti utang ti maimatangan a problema, nu diket pakairamanan metlaeng dagiti saan a patas a wagas ti panagkolekta iti utang.
Adu metlaeng dagiti reklamo a naawat ti SEC maipanggep kadagiti nangato unay nga interest ken penalties, kasta metten ti panangibabain kadagiti umutang babaen iti social media.
Kabayatanna, inlawlawag ni Atty. Noel Niel Malimban, Regional Director ti BSP North Luzon Regional Office, a mangar-aramat dagiti scammer kadagiti social engineering schemes tapno maalada dagiti personal ken pinansyal nga impormasion dagiti indibidual ken makontrol dagiti financial accounts dagitoy.
Karaman kadagiti ar-aramatenda a pamay-an ket ti phishing babaen kadagiti email ken text messages no sadino agpampammarangda a kadagiti legal a bangko ken financial institutions.
Babaen kadagitoy a wagas, mabalin a maallilaw dagiti biktima a mangibingay kadagiti password, one-time PIN (OTP), ken dadduma pay a sensitibo nga impormasion a mabalin nga aramaten dagiti scammer tapno maagaw dagiti kuartada.
Nagballaag met ni Malimban kadagiti umili a saanda nga aglukat kadagiti mapagduaduaan a link a maipatulod babaen kadagiti text messages, kasta met a liklikanda ti panangipabulod kadagiti financial accounts kadagiti sabali a tao kas maipawil iti sidong ti Anti-Financial Account Scamming Act.
Binigbigda met ti kinapateg ti panangtingiting kadagiti mensahe, tawag, ken online offers sakbay nga agaramid iti aniaman a transaksion, nangruna no kiddawenda dagiti personal a detalye wenno financial information.
Pinasingkedan dagiti dua nga ahensya ti kinapateg ti panagannad iti panangibingay kadagiti personal nga impormasion, panangtingiting kadagiti online transactions, ken panangliklik kadagiti maidiaydiaya a kari kasukat iti dakkel a ganansia wenno benepisio babaen iti nalaka a wagas.
Impalagipda metlaeng iti publiko a nasaysayaat a siguradoen a rehistrado ken legal dagiti lending ken investment companies sakbay nga agited da iti personal nga impormasion wenno agipatulod iti kuarta tapno maliklikan ti panagbalin a biktima kadagiti nasao nga online scams. //via Bombo Khey Reparip
