Naisurrender kadagiti nagduduma a police station iti Baguio City ti dua a loose firearm idi napalabas nga aldaw.
Boluntaryo nga insurrender ti maysa lalaki nga agtawen iti 35 ken residente ti Camp Allen, Baguio City ti maysa a caliber .22 firearm nga awanan iti serial number, ammunition ken markings.
Sigun iti lalaki, naawatna ti nasao a paltog manipud iti maysa a gayyemna. Gapu iti daytoy, nagdesisyon daytoy nga isurrender ti paltog iti pulisya.
Kabayatanna, insurrender met ti maysa a babaen nga agtawen iti 32, residente ti Aurora Hill, Baguio City ti maysa a homemade caliber .38 revolver nga awanan iti serial number ken ammunition.
Maatap met a nasarakanna ti nasao a paltog bayat ti panagsegregate na kadagiti basura ken panagkolekta na kadagiti scrap materials iti garbage collection area ti barangayda. Dagus met nga inturongna ti nasao a paltog iti police station.
Kabayatanna, impalagip manen ti otoridad kadagiti residente ti siyudad a rumbeng nga isurrender dagiti loose firearm nga adda kadakuada tapno maliklikan ti panagaramat kadagitoy kadagiti saan nga umno wenno illegal a wagas.
Inawis met ti publiko nga iyuman kadagiti asideg a police station dagiti impormasion maipapan iti presensia dagiti ilegal nga armas iti komunidad.// via Bombo Khey Reparip
