--Ads--
Pimmusay ti uppat nga indibidual kalpasan a binumtak ti maysa a pagar-aramidan ti paputok idiay Malasiqui, Pangasinan.
Kinumpirmar ni Malasiqui Vice Mayor Daria Dolores Mamaril ti ipupusay dagiti biktima pasado alas-syete rabii idi kalman, Nobyembre 4.
Karaman kadagiti pimmusay ti agtawen iti pito bayat nga adda pay ti maysa nga indibidual a naireport a mapukpukaw.
Sigun iti inisyal nga imbestigasyon dagiti otoridad, kellaat lattan a nangngegan dagiti kabingbang a barangay a Tabo Sili ken Calbueg ti panagbettak sakbay a napasamak ti uram.
Naduktalan met a ti naapektaran a pasdek ket maysa nga iligal a pangar-aramidan kadagiti paputok.
Agtultuloy met ti imbestigasyon dagiti otoridad seknan iti napasamak nga insidente.
