Kidkiddawen ita ni Department of Education (DepEd) Secretary Sonny Angara ti nainginget nga age verification ken pannaka-delete dagiti social media contents a mangipakpakita iti kinaranggas.
Daytoy ket kasaruno iti kiddaw ni President Ferdinand Marcos, Jr. kadagiti amin nga ahensya a makitinnulong iti panangsolusyon iti issue iti kinaranggas kadagiti pagadalan.
Nangbukel metlaengen ti DepED iti task force kadua ti Department of Information and Communications Technology (DICT) ken Cybercrime Investigation and Coordinating Center (CICC) child protection units tapno mangtingiting iti nasao nga isyu.
“We need to protect our children online, and we really need stricter firewalls, not systems where a child who isn’t even in high school can just click that they are 18 years old. That cannot be allowed”, sigun kenni DepEd Secretary Sonny Angara.
Tapno malabanan dagiti pangta iti online kasta metten iti pisikal nga aspeto, impeksa ni Angara a pinapigsa ti DepEd iti learner support ken emergency response systems kadagiti pagadalan.
Imbinglay pay ti nasao nga opisyal a makitintinnulongda itan iti Department of the Interior and Local Government (DILG) para iti pannakadeploy dagiti barangay officials a mangsuporta iti campus security ken pangsawar dagiti kapulisan kadagiti pagadalan.
