Ginuyugoy ti Baguio Water District (BWD) ti publiko a tumulong iti panangsalaknib ken panangidulin iti suplay ti danum babaen iti dagos a panangipakaammo kadagiti makitada a panagtagas dagiti tubo ti danum iti komunidad.
Sigun iti BWD, napateg ti napartak a panangireport kadagiti water leaks tapno maliklikan ti pannakasayang ti adu a danum ken mapagtalinaed ti nasayaat a panagserbi ti sistema ti suplay ti danum.
Inlawlawag ti opisina a mabalin a masarakan dagiti panagtagas iti igid dagiti kalsada, bangir dagiti kanal, drainage, bakante a lote, ken iti uneg dagiti residential areas.
Mabalin met a makita dagitoy iti lugar a nagtultuloy ti panagayus ti danum uray awan ti makita a pagtaudan daytoy.
Maibilang kadagiti pagilasinan ti maysa a posible a water leak ti agtultuloy a panagayus ti danum kadagiti kalsada ken bangketa, saan a gagangay a panagbasa ti daga, ken panagruar ti danum manipud iti rabaw ti daga.
Karaman ditoy ti panagpababa ti pressure ti danum ken pannakangeg iti uni ti agay-ayus a danum uray awan ti agus-usar iti danum iti asideg a lugar.
Sigun iti BWD, babaen iti napardas a panangireport, mabalin a makissayan ti pannakapukaw ti danum, mapapintas ti pannakaiwara daytoy, ken maliklikan ti pannakadadael dagiti tubo ken kalsada.
Makatulong met daytoy tapno maliklikan dagiti insidente ti low water pressure iti apektado a lugar ken mapagtalinaed ti natalged ken mapagtalkan a suplay ti danum para iti publiko.
Gapu iti dayta, makididdaw kadagiti residente ti dagus a panangipakaammo no adda ti masarakan a posible a panagtagas ti danum.
Masapul nga ipaay ti lugar a pakasarakan ti leak, dagiti asideg a pagilasinan wenno landmarks, ken ladawan no adda man tapno nalaka a maipaayan iti solusyon ken maaramid ti umino nga aksion.
Mabalin nga ireport dagitoy babaen kadagiti numero nga wenno babaen iti social media page ti Baguio Water District.
Impalagip ti BWD a tunggal report ket napateg iti panangsalimetmet iti danum isu’t gapuna a paset ti responsibilidad ti tunggal maysa ti panangsalaknib iti daytoy para iti komunidad.// Bombo Khey Reparip
