Naipaserra ti 16 nga establisiemento sadiay Brgy. Lower General Luna, Baguio City gapu iti kinaawan ti business permits dagitoy idi Biyernes, November 6.
Karaman kadagiti nangidaulo iti operasyon ti Baguio City Business Permits and Licensing office ken dagiti maseknan nga opisiales ti Barangay.
Dagiti naipeserra ket pakairamanan ti sumagmamano a food establishments, ukayan, ken dadduma pay.
Sigun kenni Marvin Finuliar Kagawad iti nasao a barangay ken Committee on Education and Trade in Industry, naikkan dagiti business owners iti umdas nga oras tapno maasikaso dagitoy dagiti business permits da.
Nupay kasta, nagtultuloy ti operasion dagiti establisiemento iti baet nga awananda iti dokumento ken permiso manipud kadagiti maseknan nga opisina.
Inlawlawag ni Finuliar a saanda a kayat nga agipaserra kadagiti business establishment ngem kasapulan nga agtumpalda iti linteg.
Impeksa ti opisyal nga iti kanito a maurnos ken makompleto dagiti business permits dagiti negosyo, mabalin dan nga-operate.
Babaen iti daytoy nga aksion, impalagip dagiti opisyal kadagiti amin a negosyante ti kinapateg ti panangala ken panangpabaro kadagiti business permit tapno maiyannatup dagiti operasyonda kadagiti ordinansa ken pagalagadan ti siudad.
Kabayatanna, ginuyugoy dagiti maseknan nga opisyal dagiti negosyante a makikoordinada kadagiti umno nga opisina tapno maliklikan dagiti multa ken dadduma pay a legal nga aksion kontra kadakuada.//Bombo Khey Reparip
