Mangrugin ti reblocking ti paset ti kalsada sadiay Km 6 (Jollibee agingga Dap-ayan), La Trinidad, Benguet ita a bulan.
Sigun kenni Mayor Roderick Awingan, ti nasao nga stretch ti kalsada a maipasidung ti reblocking ket katuloy iti nareconstruct a kalsada manipud Km4 aginnga Km5 iti napalpalabas a bulan.
Inlawlawag ti nasao nga opisyal a lasong-lasong ti sumagmamano a paset ti nasao a kalsada, rason tapnu kasapulan a maisimpa ken masukatan.
Kinuna pay daytoy nga adda metlaeng ti katuloy daytoy a road widening sadiay Cruz ken manamnama nga adda metlaeng ti sumagmamano a paset ti kalsada sadiay Camp Dangwa a maipasidung iti reblocking.
Impeksa met daytoy a posible a maileppas daytoy iti makabulan.
Innayonna pay nga agtultuloy ti pannakikoordinarda iti Department of Public Works and Highways (DPWH) tapno maaddaan iti umno a sistema wenno estratehiya tapno saan unay a masinga ti publiko nangnangruna ta adda dagiti aktibidad a maipatungpal ita a bulan kagidan iti Adivay Festival.
Kabayatanna, agkidkiddaw ti opisyal iti pannakaawat ken panaganus dagiti motorista ken publiko ken nagballakad iti panagplano iti nasayaat a panagbyahe. //via Bombo Noveh Organo
