Nalapdan ti National Bureau of Investigation ti panggep a mass shooting iti maysa a pagadalan sadiay Batac, Ilocos Norte.
Sigun kenni NBI Director Atty. Melvin Matibag, tallo a minor de edad ti nairaman iti panagplano iti mass shooting. Maysa kadakuada ti nagpudno iti bureau.
Innayon ni Matibag a naalaan dagiti menor de edad iti paltog ngem makompirmar paylaeng ti nagtaudan ti armas.
Maibasar iti inisial nga imbestigasion, panggep dagiti menor de edad nga isayangkat ti mass shooting intun Disiembre 16 wenno ti panagrugi ti Simbang Gabi.
Naaramid ti plano ita a Nobiembre babaen ti group chat.
Dumanon iti agarup 5 nga estudiante ti punterya dagitoy.
Sigun kadagiti otoridad, agkakaaruba dagiti tallo nga adda iti kustodiya ti bureau ken manamnama a maipaima iti social workers.
Maatap a biktima iti bullying ti maysa kadagiti menor de edad sipud iti Grade 7 daytoy.
Sigun iti direktor, inrefer ti Federal Bureau of Investigation ti impormasion iti NBI, a dagus a nangberipikar ken nangimbestigar iti daytoy.











