Impeksa ni Baguio City Mayor Benjamin Magalong a napintas ken agserbi a napateg a palagip kadagiti Local Government Units (LGUs) ti pallagip ni President Ferdinand R. Marcos Jr. mainaig iti umiso ken nasayaat a panangaramat kadagiti pondo ti gobyerno.
Daytoy ket kalpasan ti panangidaulo ti presidente iti panangipatulod kadagiti pondo babaen iti Disaster Rehabilitation and Reconstruction Assistance Program (DRRAP) para kadagiti LGU a naapektaran kadagiti bagyo, ginggined ken dadduma pay a didigra.
Iti aktibidad a naaramid iti Ceremonial Hall iti Malacañang Palace, nailatag ti pakabuklan nga P8.645 billion a pondo kadagiti nasurok 300 a Local Government Units iti intero a pagilian.
Dagitoy a pondo ket naisagana kas tulong iti panagibangon manen ken pannakaisubli kadagiti serbisio ken imprastraktura kadagiti lugar a nadadael gapu kadagiti didigra.
Sigun ken Mayor Magalong, napateg unay ti transparency ken pannakipaset ti komunidad iti panangimanehar kadagiti pondo, nangruna kadagiti tulong a maipaay kadagiti lokal a gobierno.
Kinunana pay a masapul a nalawag iti publiko no kasano a maaramat dagiti pondo ken no anya dagiti proyekto wenno programa a maipatungpal babaen kadagitoy.
Nangipaay met iti palagip ti alkalde kadagiti LGU a masapul a maaramat dagiti pondo iti umiso ken nainkalintegan a pamay-an, tapno dumanon dagiti tulong iti pudno a kasapulan dagiti residente a naapektaran kadagiti didigra.
Napateg met a maaddaan iti umno a panagplano ken panangmonitor iti pannakaipatungpal dagiti proyekto tapno masigurado a saan a masayang ti kuarta ti publiko.
Babaen iti daytoy, manamnama nga agtuloy ti panangipatungpal dagiti LGU kadagiti nalawag, responsable ken transparent a panangimanehar iti pondo ti gobyerno, nangruna kadagiti pondo a naipaay iti pannakabangon dagiti komunidad kalpasan dagiti didigra. // via Bombo Khey Reparip //











