BAGUIO CITY – Maisubli manen ti panaka-aramat ti General Community Quarantine (GCQ) pass wenno Pink Pass sadiay probinsia ti Abra kasaruno ti panakaipasidong ti entero a Cordillera Region iti GCQ status iti entero a bulan ti Pebrero.
Nailanad iti advisory ti provincial government ti Abra a maaramat ti GCQ pass tapno makaruar dagiti umili nga apan gumatang ti pagkasapulan ti pamilyada.
Nailanad pay a kas iti sigud, maysa laeng tunggal pamilya ti mabalin a rumwar a mangaramat iti pink pass ken saan a mabalin ti aggigiddan.
Maiparit met a rumuar iti balayda dagiti nataengan nga agtawen ti innem a pulo ket lima nga agpangato ken dagiti ubbing nga agtawen ti sangapulo ket uppat nga agpababa.
Agtalinaed met ti curfew sadiay Abra nga alas nuebe ti rabii agingga alas kwartro ti parbangon.
Maur-uray pay dagiti kanayonan a pagalagadan nga ipaulog ti provincial government ti Abra.
