Patien dagiti abogado dagiti biktima ti extrajudicial killing (EJK) kabayatan ti kontrobersial a drug war ni sigud a President Rodrigo Duterte nga asidegen nga agpatingga ti imbestigasion.
Daytoy ket kagiddan ti panagapela ti International Criminal Court (ICC) kadagiti saksi.
Sigun kenni Atty. Kristina Conti ti National Union of Peoples’ Lawyers (NUPL) ken assistant to counsel, panagsagana iti trial ti panagsapul ti International Criminal Court kadagiti saksi, nga agboluntario tapno makaala ti nasao a korte ti impormasion seknan iti war on drugs.
Iti apela para kadagiti saksi, agsapsapul ti nasao a korte kadagiti indibidual nga adda pannakaamo iti krimen a naaramid bayat ti anti-illegal drugs campaign iti sidong ni sigud a President Rodrigo Duterte a mapapati a nakatayan ti rinibribu a tattao bayat ti operasion.
Karaman kadagiti kidkiddawenda nga agbalin a saksi ket ti kameng ti Philippine National Police (PNP), Philippine Drug Enforcement Agency (PDEA), National Bureau of Investigation (NBI), ken dagiti local government officials.
Kabayatanna, iti agdama ket awan pay ti komento ti kampo ni sigud a President Rodrigo Duterte seknan iti nasao a banag.
