Napadayawan ti innem a medal-winning nga atleta a nangirepreseta iti probinsya ti Benguet iti Palarong Pambansa ita a tawen.
Dagiti napadayawan nga atleta ket da Gerwin A. Lete manipud Sablan National High School, gold medalist iti Wushu Sanda iti sidung ni coach John Parayao ;
Shirwein Cuaban manipud Benguet National High School, silver medalist iti Pencak Silat iti sidung ni coach Renier Bencio.
Kasta met ni Charles Johnson Calawen ti Cordillera Career Development College (CCDC) High School, bronze medalist iti Wrestling iti panangigiya ni coach Joseph T. Bacani ; Noe B. Taplin Jr. ken Jhanize Ann Macuha manipud Benguet SPED Center, bronze medalists iti Mixed Bocce, nga in-coach met da coach Joy Madallang ken Aileen Tac-uyan.
Napadayawan metlaeng ni Jessa Mhea Etong manipud Sinipsip National High School gapu iti pananggun-odna iti bronze medal iti Para Games Running Long Jump iti panangigiya ni coach Ernesto Delmas Jr. bayat a nabigbig met ni Mary Grace Mates manipud Cabiten National High School iti pananggun-odna iti silver medal iti Para Games Shot Put ken bronze medal iti Running Long Jump iti sidung ni Rolando Rosal.
Inyebkas met ni Governor Melchor Diclas ken dadduma nga opisyal ti lokal a gobyerno ti Benguet ti panangkablaaw ken panagyamanda kadagiti amin nga atleta ti probinsya ken rehiyon gapu iti panangipaayda iti dayaw iti nasao a rehiyon.
Binigbig met dagitoy ti Department of Education gapu iti agtultuloy a komitmentda iti panang-ensayo kadagiti student-athletes. //bombokaren.c.sapirao
