Inaprobaranen iti House of Representatives idi kalman iti maikatlo ken maudi a pannakabasa iti absolute divorce bill.
Naaprobaran ti nasao a gakat babaen iti pakabuklan iti sangagasut dua pullo ken innem a lawmakers a nangpabor iti pannakaipasa ti House Bill No. 9349, sangagasut ket siam dagiti saan a nangpabor ken baente dagiti nag-abstain.
Sigun kenni Representative Edcel Lagman ti author iti nasao a gakat, bigbigen ti pagilian a Pilipinas ti panangipaay kadagiti pagpilian para kadagiti indibidual nga adda iti saan a naragsak ken saan a matarimaan a panagasawa babaen ti panangipalubos iti diborsio.
Nupay kasta, sumagmamano nga opisial ti saan nga umanamong iti nasao a gakat pakairamananda Representative Gloria Macapagal-Arroyo, Rufus Rodriguez, Richard Gomez ken dadduma pay.
Iti sidong ti divorce bill, adda dagiti pagbatayan tapno mabalin a mangipila iti petision dagiti agassawa, pakairamanan ti domestic wenno marital abuse ken dadduma pay.
