BAGUIO CITY– Rumrumwar iti kaudian a survey ti DSWD-Cordillera a nababa latta ti acceptance rate ti COVID-19 vaccination kadagiti indigent families wennu dagiti nakukurapay a pamilya ditoy rehiyon Cordillera.
Sigun kenni DSWD-Cordillera Regional Director Leo Quintilla, dagiti naipasidong iti nasao a survey ket dagiti miembro ti Pantawid Pamilya, LISTAHANAN ken dadduma pay.
Kinunana a kaaduan kadagiti nagbalin a respondents ti nangkuna a saanda nga agpabakuna gapu iti amak dagitoy iti posible nga epekto ti bakuna iti salun-atda.
Dinakamatna nga ado metlaeng ti damag ken pakaseknan dagiti respondents gapu iti saan a nalawag nga impormasyon seknan iti bakuna kontra iti COVID-19 ken kurang ti panaka-awat dagitoy iti nasao a programa.
Nupay kasta, impasigurado ni Quintilla a nakasaganada a mangisayangkat ti information dissimination kadagiti benipisaryo dagiti nagduduma a programa ti DSWD tapnu mapunas ti panagamak dagitoy manipud iti panagpabakunada kontra iti COVID-19.
Iti baet daytoy, inaklonna a karit ita iti DSWD ti panangipaka-awatda kadagiti maseknan a pamilya ti kinapateg ti panagpabakuna kontra iti COVID-19.
Kabayatanna, dinakamatna a nakasaganan ti listaan ti DSWD-Cordillera kadagiti nakukurapay a pamilya iti rehion a maipangruna iti kanito a marugianen ti panagbakuna kontra iti COVID-19.
