Impakaamo ti Land Transportation Office (LTO) nga addan ti impaulogda a direktiba kadagiti lokal a yunitda a mangpapigsa iti presensiada iti kalsada iti baet ti panagado dagiti lugan ita a panawen ti Paskua.
Sigun kenni LTO Chief Assistant Secretary Vigor Mendoza II, napateg ti presensiada iti kalpasan nangruna ta namnamaenda ti panagngato ti lugan iti kalkalsada sakbay ti panagrambak ti Paskua ken baro a tawen.
Tapno maipasigurado a natalged ti dalan ken maliklikan ti trapiko ken aksidente, imbilin ni Mendoza kadagiti enforcers a a mangideploy kadagiti personnel kadagiti kangrunaan a ruta ti trak iti Metro Manila ken dadduma pay a lugar iti intero a Pilipinas.
Ti pammilin ket naibilin kalpasan ti napasamak a pannakatay ti lima nga indibidual iti kalsada idiay Quezon City ken Parañaque City ita a lawas.
Indagadag ni Mendoza kadagiti truck owners ken operators a siguraduenda ti roadworthiness dagiti luganda.
Kabayatanna, imbilin dagiti opisyales ti LTO kadagiti probinsia a makikoordinar kadagiti local government units ken local police forces iti panangtulong iti traffic flow.
Agtultuloy pay ti panangisayangkat ti LTO iti surprise ken random inspections kadagiti passenger buses kasta met ti random drug testing kadagiti drayber tapno masigurado ti kinatalged iti kalsada.
