Dumanon iti agarup 10,000 a trabahador ti manamnama a makikadua iti Labor Day rally idiay Metro Manila inton Huebes tapno kiddawen kenni President Ferdinand Marcos Jr. a sertipikaranna kas “urgent” ti gakat a mangisingasing a maipangato iti P200 ti inaldaw a minimum wage.
Dagiti rally ket maisayangkat metlaeng iti dadduma pay a lugar iti Pilipinas inton Mayo a uno.
Itay laeng nabiit, kinuna ti Malakanyang a saan a magagaran ni President Ferdinand Marcos Jr. a mangsertipikar iti nasao a wagas a kas “urgent,” ken kinunana a ti imbilin ti presidente ket mapapartak ti pannakaadal nga insayangkat ti Regional Tripartite Wages and Productivity Board.
Ngem namnamaen dagiti labor groups nga inton May 1 rally ket makatulong a mangbaliw ti panunot ti presidente, ken dinakamat ti Trade Union Congress of the Philippines a ti pakaseknan ti sueldo ti maysa kadagiti rason nu apay a bimmaba ti approval rating ti presidente.
Maipalagip a naaprobaran ti P200 daily minimum wage hike bill iti second reading iti House of Representatives idi laeng bulan ti Pebrero.
