Inlawlawag ti Deparment of the Interior and Local Government (DILG) a nakasaganan ti agarup 10,000 a puwersa para iti posible a “dragnet” operation tapno matiliwda ni Senator Bato Dela Rosa.
Sigun iti nasao nga ahensiya, maideploy dagiti nadakamat a puersa apaman nga ipaulog ti International Criminal Court (ICC) ti warrant of arrest kontra iti senador.
“As of latest update, the DILG is preparing a 10k task force for the dragnet operations in case a warrant of arrest for Senator Bato is issued,” sigun iti mensahe ni Interior Secretary Jonvic Remulla iti media.
Innayonna pay a posible nga adda iti Davao region ni Senator Bato Dela Rosa.
Nupay kasta, saanen daytoy a nangipaay ti kanayunan a detalye iti partikular a lokasyon daytoy.
Ti dragnet operation ket maysa a large-scale operation no sadino maideploy dagiti personnel kadagiti nagduduma a lugar nga asideg iti lokasyon ti target person tapno maarestar daytoy.
Maipalagip a maysa ni Senator Dela Rosa kadagiti co-perpetrators ni sigud a president Rodrigo Duterte iti sangsangwenna a kaso a crimes against humanity iti International Criminal Court (ICC). //bombokaren.c.s
